電影就是政治

  林七鋒(杜汶澤飾)話去街市買條菜都係政治。

  無錯,生活每一個層面都涉及政治,《選老頂》單刀直入就講呢個問題。

  其實,「選舉」已經滲入生活每一個層面,由小學生選班長,到黑社會選大佬,再到一個地方要選特區首長,每係講緊政治。如果有條友話,「政治呢啲野,我從都唔掂。」咁佢真係好天真。

  邱禮濤係大膽嘅,《選老頂》整個主清晰,講緊嘅係唔可以再俾老叔父話晒事,選話事人唔要係欽點,要人人都要有份玩。之不過,最後你會發現,就算神爺(黃秋生飾)准你一人一票選話事人,你以為真係人人都可以話事,以為選出黎嘅話事人可以話到事?雖然,神爺最後死左係自己啲屎中間,可算係諷刺現今政權,但係原來所謂一人一票民主制度,都係當權者嘅手段,而唔係本身嘅目的。

  係《選老頂》入面,有幾個角色係好突顯到,乜野係政治。神爺由頭到尾都係要話事,最後甚至出賣自己嘅手下,同警方達成共識,一野撬起左林七鋒同豺狼(王宗堯飾)。天叔更講到明,要買票,林七鋒唔係豺狼個皮,但天叔要嘅野係權力平衡。徐警司(黃德斌飾)同豺狼嘅合謀,更講明政治入面,無對錯,無交情,只有利益。佢最後睇住黑社會就黎開片而命令收隊,你就會知道整個治政都係一個層級式嘅權力遊戲。

  不過,有幾樣野,就真係唔明。唔知係唔係最後剪片時剪左。咖啡(吳浩康飾)嘅角色同情節係套戲入面有乜重要呢?而豺狼同佢條靚(洪卓立飾)嘅Gay佬關係想講乜呢?仲有阿七手下(凌梓維飾)做乜要俾人斬斷手呢?陸寶輝(姜皓文飾)同個女又想講乜?唔通導演想拍下集?套戲成為三級片,可能因為係戲入面太多裸露鏡頭同血腥場面,但導演其實係想要做乜效果呢?呢啲,我都唔明。

  聞說,這《選老頂》本來是叫《選老坐》的,因為種種的考慮,最終改了名字。「老坐」本來之意就是指到黑社會的坐館,即龍頭大哥。為了敬重「老頂」「老坐」,這些甚俱粵語韻味的表達,故本文以廣東話寫成。做成不便,敬請見諒。